၁။
မန်ကျည်းရွက် စိပ်စိပ်တို့၏ အရိပ်ကြဲ ဖြန့်ထားသော မြေတလင်းဝယ် သူ ထိုင်နေမိသည်။

ဤနေရာကား ငယ်စဉ်က သူ စာကျက်ခဲ့ရာ နေရာလေး တစ်ခုပင်။ နယူးစတား ဒီရီဒါ စာအုပ် အဖုံးပေါ်မှ ဘောင်းဘီတိုလေးနှင့် ကောင်လေးကို သူ လွမ်းဆွတ် သတိရနေမိ၏။ ဤနေရာကား ငယ်စဉ်က ကျောက်ဒိုး လှိမ့်တမ်း ကစားခဲ့ရာ နေရာလေး တစ်ခုပင်။ မြေပြင်ဝယ် ၀ိုင်းစက်သော တွင်းငယ်လေးများ စီရရီ ပေါ်လာသည် ထင်မိ၏။ ဤနေရာကား ငယ်စဉ်က သူ သုံးထပ်ကျား ကစားခဲ့ရာ နေရာလေး တစ်ခုပင်။ မြေပြင်ဝယ် တုတ်ချောင်းဖြင့် ရေးခြစ်ထားသော စတုရန်း သုံးဆင့် ပေါ်လာသည် ထင်မိ၏။

“သားတို့နေတဲ့ မြို့က မော်တော်ကား တစ်စီးမှ မရှိဘူးဆို ဟုတ်လား သား”

အိမ်ခန်းထဲမှ တိုးထွက်လာသော မေမေ့ အသံကို ကြားရ၏။ မေမေ့ အနားမှ သူ ထွက်ခွာ လာခဲ့သည်မှာ အချိန်အတော် ကြာသွားပြီ ဖြစ်ကြောင်း သတိပြုမိ၏။ မေမေသည် သားကို သူ့အနီးတွင် ရှိနေစေချင်သည့် အခါတိုင်း ဤသို့ပင် စကားတံတား သွယ်တန်း၍ ခေါ်ယူလေ့ ရှိသည်။ သူ အိမ်ထဲသို့ ၀င်ခဲ့ သည်။ မေမေ့ကို နှိပ်ပေးနေသော ဒေါ်ဒေါ်ဥက သူ့ကို ပြုံးပြီး နှုတ်ဆက်၏။

“မေမေ့ကို ဘယ်သူပြောလဲ”
မေမေ့အနီးကြမ်းပြင်တွင် သူ ထိုင်လိုက်သည်။

“မြေးလေးက ပြောတာပဲ”
ဒေါ်ဒေါ်ဥက မေမေ့ပခုံးသားများကို တံတောင်ဖြင့် ကြိတ်ပေးလျက် ရှိ၏။

“သာယာကုန်းက မြို့မှ မဟုတ်တာ မေမေရဲ့။ ဘောဂ ၀တီမြစ်က ရွာကိုပတ်ပြီး စီးနေတော့ ကုန်းလမ်း မပေါက်ဘူး လေ။ ဒီတော့ မော်တော်ကားလည်း မရှိဘူးပေါ့။ ကားမရှိတာက ဘာဟုတ်သေးလဲ။ လမ်းပေါ်မှာ လမ်းလျှောက်သွား နေတဲ့ လူတွေကိုကြည့်လိုက်ရင် လူဆယ်ယောက်မှာ ငါးယောက် က ဖိနပ်မပါဘူး”
သူ့စကားကြောင့် ဒေါ်ဒေါ်ဥ အံ့အား သင့်သွားဟန် ရှိသည်။ နိမ့်မြင့် လှုပ်ရှားနေသော တံတောင်ဆစ်များ ခေတ္တရပ် တန့်သွား၏။
“ဆရာမကြီးကလည်းတော်၊ ကိုယ့်မှာ သားလေး တစ်ယောက်တည်း ရှိတာ၊ ဘာလို့များ ဒီလောက်ခေါင်တဲ့ အရပ်ကို ပို့ထားပါလိမ့်”

“ကျွန်တော်က အစိုးရ အမှုထမ်းကို ဒေါ်ဒေါ်ဥရဲ့။ တာဝန် ကျတဲ့ ဒေသကို သွားရတာပေါ့”
မေမေက ဒေါ်ဒေါ်ဥ၏ တံတောင်ကို လက်ဖြင့် ဆုပ်ကိုင်ပြီး အသာအယာ ဖယ်ရှားလိုက်၏။ ခဏနားဦး ဆိုသော သဘော။

“ဒေါ်ဥ ထမင်းစားပြီးမှ ပြန်နော်”

ဒေါ်ဒေါ်ဥက ဆေးလိပ်ခွက်ထဲမှ ပြောင်းဖူးဖက် ဆေးလိပ်တိုကို ယူပြီး ကြေးဝါမီးခြစ်ဖြင့် မီးညှိ၏။ ဆေးလိပ်ထိပ်တွင် ၀ုတ်ခနဲ မီးတောက် ဖြာထွက်လာသည် အထိ ဖွာရှိုက်ပြီးမှ တံတွေး စွတ်စိုနေသော လက်ချောင်းဖြင့် မီးတောက်ကို ငြှိမ်း သတ်လိုက်သည်။
“သားကြီး ပြန်လာတဲ့ အခါ ဘာတွေများ ချက်ကျွေးနေလဲ ဆရာမကြီးရဲ့”

“ကျွန်မ ဘာမှ ချက်မကျွေးရပါဘူးရှင်။ အညာ ပြန်လာတဲ့ အခါ အညာစာတွေ စားချင်တယ်ဆိုပြီး သူတို့ဟာ သူတို့ စီမံနေကြတာပါ။ ဒီနေ့ ချက်စားတဲ့ ဟင်းတွေကို ပြောပြ လိုက်ပါဦး သားရဲ့။ မင့်ဒေါ်ဒေါ်ဥကို”

“ဆူးပုပ်ကလေးနဲ့ နရှာကြီး ရွက်ဟင်းချိုလေ ဒေါ်ဒေါ်ဥ ရဲ့။ ငရုတ်သီးတောင့်လေး မီးကင်ပြီး ခတ်မယ် စိတ်ကူးတာပဲ။ ပြီးတော့ ပဲကြီးနှပ်။ အငန်ကတော့ ငါးပိ တစ်ခဲကို ခရမ်းချဉ်သီး နိုင်းချင်းနဲ့ ချက်ထားတယ်။ တမာရွက် တို့စရာ၊ သရက် သီးခြောက်နဲ့ ၀က်သား ရောချက်ထားတဲ့ ဟင်းလေးက တစ် ခွက်၊ ဒေါ်ဒေါ်ဥ မြိန်မှာပါ”

မေမေက ပြေကျလာသော ဆံပင်များကို လက်ဖြင့်သိမ်း ရစ်ရင်း ပြန်ထုံးနေ၏။ ငွေရောင်သမ်းနေသော ဆံမျှင် တချို့ကို သတိပြုမိသည်။
“ဒီကောင်က အစားသမား ဒေါ်ဥရဲ့။ သူငယ်ငယ်က စာကျက်စေချင်ရင် အစားနဲ့ပဲ ချော့ပြီး အကျက် ခိုင်းရတယ်။ ပန်းသီးစိတ်ကလေးတွေ စိတ်ထားပြီး သား စာကျက်နော်။ စာတစ်ပုဒ် ရလို့ မေမေ့ကို ပြန်ပြနိုင်တိုင်း ပန်းသီးတစ်စိတ် စားရမယ်လို့သာ ပြောလိုက်။ စာတွေ တအား ကုန်းအော်ပြီး ကျက်တော့တာပဲ”

မြေသြဇာ ကျွေး၍ ပြုစု ပျိုးထောင်ပေးခဲ့ရသော အပင် ငယ်လေးကို ပြန်လည် သတိရဟန်ဖြင့် မေမေ့ မျက်နှာပြုံးရွှင် နေသည်။
“ဒါ့ကြောင့်လည်း ဆရာဝန်ကြီး ဖြစ်တာပေါ့တော်”

ဒေါ်ဒေါ်ဥက ဆေးလိပ်တိုကို ခွက်ထဲသို့ ပြန်ထည့် လိုက်ရင်း သုံးသပ်၏။ ထို့နောက် မေမေ့ကို တစ်ကျော့ နှိပ်ပေးရန် ပြင်ဆင်သည်။
“ကျွန်မတော့လေ ကိုယ့်မှာ သားသမီး မရှိပေမဲ့ သူများ သားသမီးတွေ ထွန်းထွန်း ပေါက်ပေါက် ဖြစ်တာများ မြင်ရရင် သိပ်ကြည်နူးတာပဲ။ ၇ လမ်းထဲက မမြခင်သားလေး ဖိုးထောင်ကို ဆရာမကြီး သိတယ် မဟုတ်လား။ ပြီးခဲ့တဲ့ သီတင်းကျွတ်တုန်းက အမေ လှူချင်တာလှူဖို့ဆိုပြီး ငွေ ငါးထောင် လာပေးသွားသတဲ့။ လိမ္မာလိုက်တာ”

ဖိုးထောင်လိမ္မာပုံကို သူ အားကျသွားမိသည်။ သင်္ကြန် တွင်းမှာလုပ်မည့် မေမေ့ ဆွမ်းကျွေးအတွက် ပြန်စရိတ်ကို ချိန်ဆရင်း ငွေနှစ်ရာ ထည့်ရန် စိတ်ကူးထားသည်မှာ နည်းလွန်းနေလားဟု သူ တွေးနေမိ၏။ ဒေါ်ဒေါ်ဥကား သူ့လုပ်ငန်း သဘာဝအရ အိမ်တိုင်းသို့ ၀င်ထွက်ခွင့် ရသူဖြစ်ရာ မြို့လေးမှ သတင်း မျိုးစုံကို ကြားသိ နေခဲ့ပေသည်။ ဒေါ်ဒေါ်ဥသည် သူ နှစ်သိမ့်ကြည်နူးမိသော သတင်း တစ်ပုဒ်ကို ဆက်လက် ပြောဆိုလျက် ရှိ၏။ “ဈေး ပိုင်းက မဌေးရဲ့သား မောင်အောင်ဘကတော့ မြို့ကိုအလည် ပြန်လာရင်း သူ့အမေအိမ်ကို ပြင်ဆောက် ပေးသွားတယ်။ အုတ်ခံအိမ်ကြီးကို ဟိန်းနေတာပဲ ဆရာမကြီးရယ်”

ရေနံငတ်သဖြင့် မွဲခြောက်ခြောက်နေသော နံရံပျဉ်ချပ် များကို သူ ငေးကြည့်နေမိ၏။ သည်တစ်ခေါက်တော့ ဈေးကြီးလွန်း၍ ရေနံချေးချည်း မတတ်နိုင်သည့်တိုင် ဒီဇယ်ဆီ နှင့် ရောလို့ပဲဖြစ်ဖြစ် မေမေ့အိမ်လေးကို ရေနံ သုတ်ပေးသွား ရန်သူ ဆုံးဖြတ်လိုက်၏။

“အဲဒီ မောင်ဖိုးထောင်ရော၊ မောင်အောင်ဘရောဟာ ကျွန်မ တပည့်တွေပဲ”
မေမေက ဆရာမကြီးပီပီ လိမ္မာသော တပည့်များအတွက် ဂုဏ်ယူပြောဆိုလိုက်၏။
သူ၏ ခုန်နှုန်းမြန်လာသော နှလုံးသားကလည်း တိတ် ဆိတ်သောစကားတစ်ခွန်းကို ဟစ်ကြွေးလိုက်သည်။
“အဲဒီဖိုးထောင်တို့၊ အောင်ဘတို့ဟာလေ ကျွန်တော့် သူငယ်ချင်းတွေပါပဲ ဒေါ်ဒေါ်ဥရယ်”


၂။
ထင်းရှူးပင်ပုလေးများ၏ အပ်ချောင်းလို ချွန်မြသော ရွက်သေးမျှင်မျှင်များအကြားတွင် ရောင်စုံမီးလုံးများ ပြိုးပြက် တောက်ပနေကြ၏။
စိမ်းလဲ့လဲ့ မြက်ခင်းပေါ်တွင် ခင်းသန့်ဖြူဖြန့်လွှားထား သော စားပွဲဝိုင်းများ အစီအရီ ရှိနေသည်။
ဥရောပ ၀တ်စုံဝတ်ထားသော စားပွဲထိုးများက အဖျော် ယမကာနှင့် စားမြိန်စာများ တင်ထားသော လင်ပန်းများကို သယ်ဆောင်လျက် စားပွဲတစ်ခုမှ တစ်ခုသို့ လိပ်ပြာလေးများ သဖွယ် တုံ့ခေါက်လူးလာ ပျံဝဲနေကြ၏။ အသံအိမ်များထဲမှာ ငြိမ့်ညောင်းသာယာစွာ စီးဆင်းလာသော အိပ်မက်ဝိုင် တေးသွားကို ယစ်မူးစဖွယ် ကြားနေရ ၏။

“အောင်ဘကြီးကို စောင့်ရင်း ဖြည်းဖြည်း စရိုက်ကြစို့ လား”

ဖိုးထောင်က စီးကရက် ကြော်ငြာစာတန်း ရှည်ပါသော ဖန်ခွက်နှစ်လုံးကို အနီးသို့ ဆွဲယူလိုက်၏။ သူနှင့် ဖိုးထောင် နှစ်ဦးသား မိုးမခမြိုင် စားတော်ဆက်သို့ အရင်ရောက်နှင့် နေကြသည်။ အောင်ဘက ဧည့်ခံပွဲတစ်ခု ရှိနေသဖြင့် နောက်ကျမည်ဟု ဆို၏။

ရမ်ပုလင်း စက္ကူပတ်ပေါ်မှ ဘီယာ ရာပြည့် တံဆိပ်ကို သူ ငေးကြည့်နေမိသည်။ ဖိုးထောင်၏ မျက်နှာပေါ်သို့ အကြည့် ရွှေ့လိုက်၏။
“မင်း ဘယ်နှခေါက် ရှိသွားပြီလဲ”

“နှစ်ခေါက်”
“ပထမ တစ်ခေါက်က အချိန် ဘယ်လောက်ကြာလဲ”

“တစ်နှစ်”

ပုစ္ဆာ တစ်ပုဒ်ကို သူ တွက်နေမိသည်။ တစ်နှစ်ကား တစ်စီး၊ အောက်ထစ် ကျပ်ငွေတစ်သိန်း။
“တို့ အလုပ်က စွန့်စွန့်စားစား ပင်ပင်ပန်းပန်း လုပ်ရတဲ့ အလုပ်ပါ သင်းအောင်ရာ။ အောင်ဘကြီး အလုပ်ကမှ ဟန်ကျတာကွ။ ဘာမှ လူမပင်ပန်းဘူး။ ဒီကောင်ကြီးကတော့ တကယ့်ကို ချမ်းသာနေပြီ”

အင်းလျားလမ်းတွင် ရှိသော အောင်ဘအိမ်သို့ ရောက်ခဲ့စဉ်က မြင်ကွင်းကို သူ သတိရနေမိ၏။ ဂေါက်ရိုက် လေ့ကျင့်ရန် အလှ မွေးထားသော မြက်ခင်းစိမ်းစိမ်း၊ ရေသူမ ရုပ်လေး၏ လက်ချောင်းများအကြားမှ ဖြာထွက်နေသော ရေပန်းများ၊ ကျွန်းသားပါကေး ကြမ်းပြင်ပေါ်မှ ရိတ်သိမ်း၍ ရနိုင်လောက် အောင် အမွေးအမှင် ရှည်လျားအိထွေးသော ကြမ်းခင်းကော်ဇော။

စုပ်မျိုလိုက်သော ယမကာ တစ်ကျိုက်၏ ခါးသက်သက် အရသာကြောင့် ဖက်ထုပ်ကြော်တစ်ခုကို ၀ါးနေလိုက်သည်။
“ဟော အောင်ဘ ရောက်လာပြီ”

တိုက်ပုံအင်္ကျီအဖြူ ရှပ်အင်္ကျီကော်လာခေါင်းတုံးနှင့် စိမ်း ပြာရောင်ရခိုင်လုံချည်တို့ကို ၀တ်ဆင်လျက် လှမ်းဝင်လာသော အောင်ဘကို တွေ့လိုက်ရ၏။
“အိတ်ကျုစ်မီ သူငယ်ချင်း။ အင်းလျားလိပ်မှာ လုပ်တဲ့ သတို့သားရဲ့ ဧည့်ခံပွဲက တန်းလာခဲ့ရတာ။ အ၀တ်အစားတွေ ပဲ ကြည့်တော့”

သူရော ဖိုးထောင်ပါ ခွင့်လွှတ်ပြုံးပြုံးလိုက်ကြသည်။
“မင်း ရန်ကုန်ရောက်တယ်ကြားကတည်းက ငါ ဖိုးထောင်ကို အချိန်း ခိုင်းနေတာ။ ဒီကောင် ညံ့လို့ ဒီနေ့မှ ဆုံ ဖြစ်တာ”
အောင်ဘက ကမ္ဘာကြီး တစ်ခုလုံးကို အိတ်ထဲတွင် ထည့်ထား နိုင်သူတို့၏ အသံမျိုးဖြင့် ပြော၏။
“ငါလည်း နေ့တိုင်း ဆက်တာပဲကွ။ သူတို့ ရုံးဖုန်းက အင်ဂေ့ဂ်ျဖြစ်နေတာ ဆက်လို့ကို မရဘူး”

စားပွဲထိုးများ အောင်ဘ အနီးသို့ အလုအယက် ချဉ်းကပ် လာကြ၏။ အောင်ဘက သူတို့ကို လှည့်မကြည့်။ စားပွဲပေါ်မှ ရမ်ပုလင်းကိုသာ စူးစိုက်ကြည့်သည်။
“ဟေ့ ဖိုးထောင် ဘယ်လိုလဲကွ။ သူငယ်ချင်း ဆရာဝန်ကြီး တစ်ယောက်လုံးကို ဧည့်ခံတာ ဒီအရက်မျိုးနဲ့ပဲလား”

အောင်ဘ ကစားပွဲပေါ်မှ ရမ်ပုလင်းကို ဆတ်ခနဲ လှမ်းယူလိုက်၏။ ပုလင်းပိတ် ၀က်အူရစ်ကို လှည့်ဖွင့်နေသည်။ ထို့နောက် ပုလင်းထဲမှ အရက်များကို စောင်းငဲ့ သွန်ချပစ် လိုက်၏။ ပတ္တမြားရောင် ရေတံခွန်ငယ် တစ်ခု စီးသွယ်ဖြာကျလျက် ရှိသည်ကို လှပစွာ မြင်တွေ့ရ၏။

သင်းအောင်က ဖိုးထောင်၏ မျက်နှာကို ကြည့်လိုက်သည်။ ဒေါသရိပ်ခြည် စွန်းထင်ခြင်း မရှိ။ ကျေနပ် အားရမှုကြောင့် ပွင့်လက်လာသော အပြုံးရိပ်ကိုသာ မြင်တွေ့ရ၏။ အောင်ဘက အရက် ကုန်သွားသော ပုလင်းခွံကို မြက်ခင်းပေါ်သို့ ပစ်ချလိုက်၏။ သံတမန် အိတ်ကို ခလုတ်နှိပ်၍ ဖွင့်သည်။ တံဆိပ်နက် ၀ီစကီ တစ်လုံးကို ထုတ်ယူပြီး စားပွဲသို့ အသံမြည်သွားအောင် ဆောင့်ချလိုက်၏။

“ဒီလို ထိုက်ထိုက်တန်တန် လုပ်ပါကွ”
ကုလားထိုင်လွတ်တစ်လုံး၌ အောင်ဘ ထိုင်သည်။

“မင်းတို့ ဘာတွေ မှာထားကြသလဲ”

“ဟိုဟာ ဒီဟာ ဘာညာ ကွိကွပေါ့ကွာ”

ဖိုးထောင်၏ အသံသည် ဖျော့တော့ ပါးလျလျက် ရှိ၏။
“ဟေ့ သူတို့ မှာထားတာတွေ အကုန်လုံး ရပ်ပစ်လိုက် တော့”

စားပွဲထိုးက ရိုသေစွာ ဦးညွှတ်ပြသည်။
“ဖတ်စကလပ် တစ်ပွဲလုပ်ကွာ။ တင်းန်ကို့စ်ပေါ့။ ငါးမန်းတောင် ကြက်ကော်ရည်နဲ့ ၀က်ကလေးကင်တော့ ပါပေ့စေ။ သြော် ပွဲသိမ်း အချိုရည်က လိုက်ချီးစ်ဘူး ဖောက်ပေး။ ဘူးနော်ဘူး။ ပေါင်းထားတဲ့ လိုကယ်တွေ ယူမလာခဲ့နဲ့”

ဟင်းလျာဆယ်မျိုး ပါသော ပထမတန်းစား တစ်ဝိုင်းစာ မှာနေခြင်းဟု နားလည်လိုက်၏။ ဖန်ခွက်ကို သူ လှမ်းယူ လိုက်သည်။ ၀ီစကီကောင်းတို့၏ အရည်အသွေး တစ်ရပ် ဖြစ်သော ချောမွေ့ညက်ညောခြင်းကို လျှာဖြင့် တွေ့ထိခံစား နေမိ၏။

“တို့ သူငယ်ချင်းတွေထဲမှာ မင်းတစ်ယောက်ပဲ ဆရာဝန် ဖြစ်တယ်ကွ။ မင်းအတွက် ငါ သိပ်ဂုဏ်ယူတယ်”

ကိုစောညိန်း၏ ပွင့်ဦး သီချင်းကို ကြားယောင်မိသည်။ “လှောင်တာလေလားနော်ကွယ်”ဟူသော အပိုဒ်ကလေးကို ညည်းညူသံဖြင့် ရွတ်ဆိုချင်စိတ် ပေါ်လာ၏။ အောင်ဘ၏ မျက်နှာကို မလုံမလဲ ကြည့်မိ၏။ မျက်လုံးမှာ လေသံမှာ လှောင်ပြောင်ရိပ်ကို မတွေ့ရ။ ချစ်ခင်လေးစားသော အကြည့်၊ လှိုက်လှဲသော အသံတို့ စေတနာမှန်ဖြင့် ပြောသော စကားဟု ယုံကြည်စိတ်ချကာ အနည်းငယ် နေသာထိုင်သာ ရှိသွားသည်။

ဇလုံထဲမှ ရေခဲကြီးကြီး တစ်တုံးကိုယူ၍ ဖန်ခွက်ထဲ ထည့်လိုက်၏။ ဖန်ခွက်ထဲတွင် ကျောက်ဆောင်နှင့် ရွှေဝါရောင် လှိုင်း ဂယက်နှင့် လှပသော သမုဒ္ဒရာတစ်စင်း ပေါ်ထွန်းသည်။ ဖိုးထောင်က အောင်ဘဘက်သို့ စောင်းငဲ့၍ တစ်စုံ တစ်ရာ ပြောသည်။ အောင်ဘကလည်း ပြန်ပြော၏။ မိမိနှင့် ဝေးလှမ်းလှသော ဘာသာစကားများဖြစ်သဖြင့် ခပ်မဆိတ် နေလိုက်၏။

တိုယိုတာကိုရိုလာ ဒီအိတ်က်စ်၊ အက်စ်အီး၊ စပရင်တာ၊ ဟိုက်လပ်၊ ပတ်ဘလစ်ကာ၊ နီဆန်းပရက်စတို၊ ဆန်နီ။ ဖူဂျီယာမာ နှင်းပွင့် တောင်ထိပ်သို့ သူ ရောက်သွား၏။ အရိုးခိုက်အောင် အေးမြသောလေက တဟူးဟူးတိုက်ခတ် နေသည်။ နံပါတ်အနက်၊ နံပါတ်အနီ၊ ယာယီနံပါတ်၊ ပါမစ် ၀ယ်ခြင်း။
“ဟေ့ သင်းအောင်၊ မင်းလည်း တစ်စီးလောက် ဆွဲထား လိုက်ပါလား။ ကိုရိုလာ(ဈ)မျဉ်းဆွဲလောက် ဖြစ်ဖြစ်ပေါ့”

ဖိုးထောင်က ရုတ်တရက် သူ့ဘက်သို့ လှည့်ပြီး ပြော၏။ ရင်ထဲတွင် ပွန်းရှသွားသည်။
“မ၀ယ်နိုင်ပါဘူး သူငယ်ချင်းရာ။ ကိုယ့်မှာ ဒီလောက် ငွေအင်အား မရှိပါဘူး”

အသံမှာ သေချာစွာ နားစိုက်ထောင်မှ ကြားနိုင်ရုံယဲ့ယဲ့ လေးဖြစ်သည်။
“ချို မနေစမ်းပါနဲ့ကွာ။ ဂျီပီလုပ်လို့ရတဲ့ ပိုက်ဆံတွေ ဘယ်သွား ထားမှာလဲ”

စားပွဲအံဆွဲ အတွင်းသို့ ကျဆင်းလာသည့် စိုထိုင်း၍ ငါးညှီနံ့သင်းသော ကျပ်တန် နွမ်းနွမ်းလေးများ စားပွဲပေါ် တွင် တင်ထားသည့် နွားနို့ တစ်ပုလင်း၊ ကြက်ဥငါးလုံး၊ ကောက်ညှင်းဆန်တစ်ပြည်။
ဘောဂ၀တီမြစ်ကမ်းနံဘေးမှ ဆေးခန်းလေးအတွင်းသို့ သူပြန်လည်ရောက်ရှိသွားသည်။
“ကိုယ့်လူနာတွေက ဆင်းရဲကြပါတယ်ကွာ”

ဇလုံထဲမှ ရေခဲသေးသေးတစ်တုံးကို ယူ၍ ဖန်ခွက်ထဲ ထည့်လိုက်၏။ စကား ပြတ်သွားကြသည်။ ဆိတ်ငြိမ်မှုသည် ပွင့်ဖတ်နွမ်း လျသော ပန်းတစ်ခြင်းကို သယ်ဆောင်လာပြီး သူတို့သုံးဦး အပေါ်သို့ ဖြည်းညင်းစွာ ကြဲဖြန့်ပေးလျက် ရှိ၏။
“မင်းက အလုပ် မလုပ်တတ်ဘူး ထင်ပါရဲ့ကွာ”

အားမလို အားမရ အာသံဖြင့် အောင်ဘက ပြော၏။
အေဂျေကရိုနင်၏ ယုဒသစ်ပင် ၀တ္ထုထဲမှ စည်းစိမ်အဆိပ် သင့်ရှာသူ ဆရာဝန် ဒေးဗစ်မိုရေး၏ ကြေကွဲဖွယ် ဘ၀နိဂုံးကို  သတိရမိသဖြင့် ကျောရိုးတစ်လျှောက်စိမ့်သွားသည်။ မိုးခါး ရေသောက်ရန် အတွက် ဟစ်ပိုကရေးတီး၏ ကတိ သစ္စာကို ချိုးဖောက် ၀ံ့ပါရဲ့လား။

မိမိ လျှောက်လာရာ လမ်းလေးကို ပြန်လှည့်ကြည့်မိ၏။ ဆင်းရဲငြိုငြင်၍ ခရီးမတွင် သော်ငြားလည်း ဤလမ်းလေးတွင် တစ်ကိုယ် ကောင်းဆန်မှု ကျင်းချိုင့်များ မရှိ။ ရက်စက် ကြမ်းကြုတ်မှုသားရဲများ မရှိ။ ချစ်ခင်မှု သစ်ပင်တို့၏ အရိပ် များရှိ၏။ ကောက်ကျစ်စဉ်းလဲမှု ထောင်ချောက်များလည်း မရှိ။ ကြင်နာမှုကျေးငှက်တို့၏ တေးသံချိုချို ရှိ၏။ ရောင့်ရဲ တင်း တိမ်မှု ရေချမ်းစင်ကလေး ရှိ၏။ ထို့ပြင်လိပ်ပြာသန့်သူတို့သာ မြင်တွေ့ခွင့်ရသော တောင်စဉ်တောင်တန်းများလည်း ရှိလေ သည်။ စိတ်နှလုံးအေးမြငြိမ်းချမ်းစေသည်မို့ ဤလျှောက် လက်စလမ်းကလေးမှာပင် ဆက်လက် လျှောက်လှမ်းရန် ဆုံးဖြတ်လိုက်သည်။

ကြက်သား၊ မျှစ်ဆိမ့်ကြော် ပန်းကန်ပေါ်သို့ ၀ဲသွားသော ဖိုးထောင်၏ လက်ထဲမှ တူနှစ်ချောင်းကို ငေးကြည့်နေမိ၏။ ငယ်စဉ်ကလေး ဘ၀က ကြည်နူးဖွယ်ရာ အဖြစ်အပျက် များကို လွမ်းမောတသစွာ ပြန်ပြောနေမိကြ၏။ ထို့နောက် စကားပြတ်သွား၏။ ဖိုးထောင်မျက်နှာ အောင်ဘဘက်သို့ လှည့်သွားပြန်သည်။ မြေကွက် အရောင်းအ၀ယ် ကိစ္စကို ဖိုးထောင်က စကားစ၏။ အောင်ဘနှင့် အချီအချ ပြောနေကြသည်။ မိမိနှင့် ဝေးလှမ်းလှသော ဘာသာစကားတစ်ရပ်ကို ထပ်မံ၍ ကြားရပြန်ပြီ ဖြစ်၏။ သူ ခပ်မဆိတ် နေရပြန်သည်။

ဂိုးလ်ဒင်းဘယ်လီ ဆိုသော အသံကို ကြားရ၏။ အင်းလျားမြိုင်ဆိုတာ ပါသည်။ ခြောက်မိုင်၊ အာတီးယား၊ ပြည် လမ်း၊ ပါရမီ။

တိမ်တိုက်ပေါ်၌ တည်ဆောက်ထားသော ဘုံဗိမာန်များကို ၀င်းဝင်းလျှပ်လျှပ် မြင်ယောင်လာမိသည်။ “ပါရမီမသီနှင့်၊ ဘုံခန်းမစမ်းနှင့်”ဟူသော ကျောင်းတုန်းက မြန်မာစာ ဆရာ၏ အဆိုအမိန့်ကို မဆီမဆိုင် သတိရနေမိသည်။

“သင်းအောင် မင်းစိတ်ကူး မလွဲနဲ့။ ရန်ကုန်မှာ မြေတစ်ကွက်လောက် ၀ယ်ပြီး အခြေချထားဖို့ ကောင်းပြီ”

ထစ်ချုန်း မြည်ဟိန်းလိုက်သော အောင်ဘ၏ အသံကြောင့် သူ ထိတ်လန့်သွားသည်။ ကြက်သီးတွေ တဖြန်းဖြန်း ထလာ၏။ ထူအမ်းအမ်း ဖြစ်လာသော မျက်နှာကို လက်ကိုင် ပ၀ါဖြင့် ပွတ်ရင်း ဖုံးကွယ်ထားရ၏။
တုန်ခါမှုနှုန်း မြင့်မားလှသော အောင်ဘ၏ အသံစူးစူးကို ဆက်လက် ကြားနေရ၏။

“ဘာလဲ ပင်စင် ယူပြီးမှ ၀ယ်မယ်လို့ ဆင်ခြေပေးဦး မလို့လား။ မြေကွက် ဈေးနှုန်းက မင်းပင်စင် ယူတဲ့ အထိ ငြိမ်ပြီး စောင့်နေမှာ မဟုတ်ဘူးကွ။ စဉ်းစားမနေနဲ့ ၀ယ်ထားရင် မမှားဘူး။ မင်း ကြိုက်တဲ့ နေရာသာပြော။ တို့ ၀ိုင်းရှာပေးမယ်။ ဘယ်နေရာကြိုက်လဲ။ ခြောက်မိုင်မှာလား၊ ပါရမီမှာလား”

နှုတ်ဖြင့် ဖြေဆိုရန် အတွက် စကားဝါကျ ခေါင်းပါး လွန်းလှ၏။ ရင်ထဲကမူ စကားတွေ အများကြီး ပြောနေမိသည်။ ဘယ်လို ဖြေရမှာလဲ သူငယ်ချင်းရယ်။ မင်းပြောတဲ့ မြေကွက်က တစ်ပေကို ဘယ်လောက်နှုန်း ပေးချေရမှာတဲ့လဲ။ မြေတစ်ပေ ပတ်လည်ပေါ်မှာ အိမ်တစ်လုံး ဆောက်လို့ရော ရနိုင်ရဲ့တဲ့လား။ ရနိုင်တယ် ဆိုရင် အဲဒီ အိမ်လေးက သေးသေးလေး နေမှာပေါ့နော်။ တို့ငယ်ငယ်က ကစားခဲ့ကြတဲ့ ပလတ်စတစ် အုတ်ချပ် အဖြူအနီလေးတွေနဲ့ အိမ်ကလေးမျိုး ဖြစ်မယ်ထင်တယ်။ အဲဒီ အိမ်ကလေးထဲကို ၀င်နိုင်ဖို့ အတွက်  ငါ့ကိုယ်ငါ ငလက်မလို လူသေးသေးလေး ဖြစ်သွားအောင်  ဖန်ဆင်း ရမှာပေါ့နော်။
အို ဖန်ဆင်းဖို့ရော လိုသေးရဲ့လားကွယ်။
ဝီစကီကြောင့်လား၊ သိမ်ငယ်စိတ်ကြောင့်လား မသိ။ မူးရိပ်မူးရိပ် ဖြစ်လာသည်။ ရင်ထဲမှ တလှပ်လှပ် ခုန်လာ၏။ လည်ချောင်းထဲမှ ယားလာသည်။ ပျို့အန်ချင်စိတ် ပေါ်လာသဖြင့် ရင်ကို လက်ဖြင့် ဖိထား၏။ တင်မောင်သန်၏ အီကိုနိုဂ်ျ နစ်ကာစီနိုးမား ရောဂါကို သွားသတိရသည်။

ဇလုံထဲတွင်ကား ရေခဲတုံး အားလုံး အရည်ပျော်လျက် ရှိလေပြီ။

၃။
ကြိုးအဆင်းအတက် သွက်လက်စေရန် အတွက် သစ်သား စက်သီးကို ရေနှစ်ခွက်ခန့်ပက်လိုက်သည်။ ဒူးတိုက်ပေါ်တွင် လက်ထောက်ရင်း တွင်းထဲသို့ ငုံ့ကြည့် ၏။ မိမိပုံရိပ်ကို မှုန်ပျပျသာ မြင်ရသည်။ မိမိတို့ မြို့လေးမှ ရေတွင်းများသည် နွေရာသီဆိုလျှင် ဤသို့ပင်ရေစ ဝေးတတ် မြဲဖြစ်၏။

ကြိုးကို လျှော့ချလိုက်၏။ ပုံးနှင့် ရေမျက်နှာပြင် တို့ထိသံကို ကြားရသည်။ ပုံးမြုပ်သွားအောင် ကြိုးကို တစ်ချက် နှစ်ချက် ဆောင့်လိုက်ပြီးမှ အားစိုက်၍ ဆွဲသည်။ စဥ့်အင်တုံ ကြီးထဲသို့ ရေတစ်ပုံးပြီးတစ်ပုံး လောင်းထည့်နေသည်။

“သားကလည်းကွယ် မေမေ ရေစည် မှာထားပါတယ် ပြောသားနဲ့ အလကား ဒုက္ခခံနေတယ်။ လက်တွေများ ပေါက် ကုန်မှဖြင့်”

မေမေ့အသံကို ကြားရ၏။
“မေမေ ချိုးဖို့ ရေကို သား ကိုယ်တိုင် ဆွဲပေးချင်လို့ပါ မေမေရဲ့”
စဥ့်အင်တုံကြီးထဲတွင် ရေပြည့်သွားမှ သူ နားသည်။
မေမေ ဖတ်ခိုင်းထားသော တောင်မြို့ဂန္ဓာရုံ ဆရာတော်၏ တစ်ဘ၀ တစ်သံသရာ စာအုပ်ကို သူ ဖတ်နေ၏။ မေမေက သူ့အနီးမှ ပက်လက် ကုလားထိုင်တွင် လာထိုင်သည်။
“ဖိုးထောင်တို့၊ အောင်ဘတို့နဲ့ သား တွေ့သေးရဲ့လား”

“တွေ့ပါတယ် မေမေရဲ့။ ရန်ကုန်ရောက်တိုင်း တွေ့ပါတယ်”

“အေးကွယ်။ မနေ့က ဒေါ်ဥကြီးပြောလို့ သူတို့လေးတွေ ကြီးပွား နေကြတယ်ဆိုတာ ကြားရတော့ ၀မ်းသာပါတယ်။ ဒါနဲ့ ဖိုးထောင်က ရန်ကုန်ကို ဘယ်လို ရောက်သွားတာလဲ။ သူက အမှုထမ်း မလုပ်ဘူးလား”
“ဒီကောင် မန္တလေး တက္ကသိုလ်မှာ ပထမနှစ် အောင်ပြီး ကတည်းက ကျောင်းဆက် မတက်ဘဲ ရန်ကုန် ဆင်းသွားတာ မေမေရ။ အမှုထမ်းလည်း လုပ်တယ်လို့ မကြားမိပါဘူး။ ခုတော့ သင်္ဘော လိုက်နေတော့ ဟန်တာပေါ့ မေမေရာ။ ရန်ကုန်မှာ တိုက်နဲ့၊ ကားနဲ့၊ သားတို့နဲ့ ဘာဆိုင်တော့တာ မှတ်လို့”

နံရံတွင် ချိတ်ဆွဲထားသော ဖယောင်းတိုင်ကားချပ်ကို သူ ငေးကြည့်နေမိ၏။
“လူကလည်း အသုံးအစွဲ ကျစ်လျစ် လိမ္မာလို့ပေါ့ သား ရယ်။ အောင်ဘကြီးကိုတော့ မေမေ မတွေ့တာ ကြာလှပြီ။ ခုနေများ တွေ့ရင် မှတ်မှ မှတ်မိပါ့မလား မဆိုနိုင်ဘူး”

“ဒီကောင်ကြီးက ရုပ်မပြောင်းဘူး မေမေရ။ နည်းနည်း ၀လာတာပဲ ရှိတယ်။ မေမေ မတွေ့တာကြာဆို ဒီကောင်က ရှစ်တန်း အောင်ပြီးတာနဲ့ ကျောင်းက ထွက်သွားတာ ဆိုတော့ ဆယ့်ငါးနှစ်လောက်တောင် ရှိသွားပြီ မေမေရ။ အဲဒီကတည်းက စီးပွားရေး လုပ်နေတာ ကြီးပွား လိုက်တာတော့ မပြောနဲ့ မေမေရာ။ အခု ဒီကောင်က ကားပွဲစားလေ”

“ကားပွဲစား”

မေမေက နားမလည်နိုင်ဟန်ဖြင့် မေး၏။
“မေမေကလည်း ကားပွဲစားဆိုလို့ လွယ်အိတ် တစ်လုံးနဲ့ လမ်းပေါ်မှာ လျှောက်နေတဲ့ ပွဲစားမျိုးလို့ မထင်နဲ့။ ဒီမှာ ထန်းလျက်တွေ လှောင်သလို ကားတွေ အများကြီး လှောင်ထားနိုင်တဲ့ ပွဲစားမျိုး မေမေရ။ အရမ်းကို ချမ်းသာတာပဲ။ သားဖြင့် သူ့တိုက်ထဲ ၀င်ရတာတောင် ခပ်ရွံ့ရွံ့ရယ်”

အမှန်လည်း ရန်ကုန်ရောက်တိုင်း အောင်ဘ၏ တိုက်ရှေ့ မှ နေ့တိုင်းဖြတ်သွားနေရပါလျက် ၀င်ဖြစ်ခဲလှ၏။
နေရင့်လာသဖြင့် အပူဓာတ် အနည်းငယ် လွှမ်းမိုးစ ပြုလာသည်။ အရှေ့တောင် အရပ်ဆီမှ တသုန်သုန် တိုက်ခတ်လာသော ကျွဲတောင်ငူ လေကလေးကြောင့် အနည်းငယ် သက်သာရာရ၏။ လှုပ်ရှားသွားသော သင်္ဘောရွက်များကို မြင်ရ၏။ ပင်စည်တွင် တွယ်ကပ်နေသော သင်္ဘောသီးများ၏ အရွယ် အစားအလိုက် အဆင့်ဆင့် တည်နေပုံ အဆင်ဒီဇိုင်းကို သူ စိတ်ဝင်စားစွာ ကြည့်နေမိသည်။

အိမ်ရှေ့ လမ်းပေါ်မှ မြင်းလှည်းတစ်စီး ရပ်လိုက်သံကို ကြားရ၏။
“နှင်းရီတို့၊ ဖိုးသားတို့ ပြန်လာကြပြီ ထင်တယ်”

သူအိမ်ရှေ့သို့ ထွက်လာခဲ့၏။ မြင်းလှည်းပေါ်မှ ပစ္စည်းများကို အောက်သို့ချသည်။ ဧရာမ ဖရဲသီးကြီး တစ်လုံးကို နှင်းရီက ပွေ့ထား၏။ မြင်းလှည်းဆရာက ပစ္စည်းများကို သယ်ဆောင်ပေးနေသဖြင့် ကျေးဇူးတင်မိ၏။

ဖိုးသားကို ချီပြီး အိမ်ထဲသို့ ၀င်ခဲ့၏။ မေမေက ဖိုးသားကို လက်ကမ်း ယူပြီး ပွေ့ချီထား၏။ နှင်းရီက ရွာမှာ ဒီနှစ်ကုလားပဲတွေ ရကြကြောင်း ပြောပြနေသည်။ စကားစ ပြတ်သွားသဖြင့် ဖတ်လက်စ စာအုပ်ကို ပြန်ကိုင်လိုက်၏။

“မြေးလေး ဒီနေ့ ဆယ့်နှစ်အလီ ထိရအောင် ကျက်ရမယ်နော်။ ဘွားဘွားက မြေးလေးဖို့ ပန်းသီးလေးတွေ စိတ်ထား တယ်။ အလီတစ်ပုဒ် ရရင် ပန်းသီးတစ်စိတ် စားရမယ်”

ဖိုးသားက သူ့ ဘွားဘွား၏ လျော့ရဲစပြုနေပြီ ဖြစ်သော ပါးပြင်ကို မွှေး၏။ နှင်းရီက မြေးအဘွားနှစ်ယောက်ကိုကြည့်ရင်း ကြည်နူးဟန်ဖြင့်ပြုံးသည်။

သူက မေမေ့ကို ကျီစယ် လိုသောကြောင့် အရွှန်းစကား ဆိုလိုက်သည်။
“မေမေ့ ပန်းသီးစိတ်တွေ စားရလွန်းလို့ သားဖြင့် သိမ်ငယ်လှပါပြီ မေမေရာ။ ခုလည်း ဖိုးသားကို ပန်းသီး စိတ်တွေ ကျွေးနေပြန်ပြီလား”

ပြောပြီးသည်နှင့် သူက ရယ်မောလိုက်၏။ မေမေက လိုက်မရယ်ချေ။ ချစ်၍ ကျီစယ်လိုက်သော စကား ဆိုသည်ကို သိ၏။ သို့သော် ဆရာမကြီးမေမေသည် သူတစ်သက်တာလုံး စွဲမြဲစွာ ယုံကြည်ခဲ့သော အကြောင်းအရာကို ထိပါးလာပါက စိုးစဉ်းမျှ သည်းခံနိုင်စွမ်းရှိဟန်မတူပေ။ မေမေ့ မျက်နှာ ရုတ်ခြည်း တင်းမာသွားသည်။ အေးစက်သော မျက်လုံးများ ဖြင့် သူ့ကို ကြည့်၏။ ထို့နောက် သူ့နှလုံးသားတိုင် ထိပါး ရိုက်ခတ်သွားစေသော စကားတစ်ခွန်းကို မေမေ ဆိုလိုက်၏။
“မေမေ့ နားရွက်ကိုများ ကိုက်ဦးမှာလား သားရယ်”

မြတ်သင်း
(ရွှေအမြုတေ မဂ္ဂဇင်း၊ဇွန်လ ၂၀၁၂)